WASIIRKA QORSHEYNTA DFS OO GAARAY DALKA KUWAIT

Wasiirka wasaaradda qorsheynta, maalgashiga iyo horumarinta dhaqaalaha xukuumadda FS Mudane Maxamuud Cabdiraxmaan (Beenebeene) ayaa gaaray dalka Kuwait, halkaas oo kaga qeyb-gali doono shirka sannadlaha ah ee golaha sare ee maamulka machadka iyo wasiirrada qorshaynta dalalka Carabta ee ku saabsan qorshaynta iyo horumarinta, kaas oo ay Kuwait marti galinayso.

Wafdiga wasiirka waxaa garoonka diyaaradaha ku soo dhoweeyey safiirka Soomaaliya ee dalkaas danjire Dr. Cabdullahi Maxamed Odowaa, lataliyaha 1-aad
Mukhtaar Cali Yuusuf iyo Cabdiwahab Xuseen Haji Maxamed oo ah lataliyahaa2-aad.

Wasiirka ayaa shirka ka jeedin doona khudbad ku saabsan arrimaha dhaqan dhaqaale ee Soomaaliya, waxaana uu warbixin ka siin doonaa wasiirrada kala duwan ee shirka ka soo qeyb-galaya hannaanka horumarka dalkeenu ka gaaray dib u habaynta hay’adaha dowliga ah.

Wasiirka oo ka mid ah xubnaha gudoonka Machadka Arab Planning Institute (API) ayaa sidioo kale waxa uu shirar kala duwan la yeelan doonaa wasiirrada dhiggiisa ah ee shirka ka qaybgalaya iyo madaxda dalka Kuwiet oo uu kala hadlayo xiriirka labada dal iyo sidii uu sii xoogeysan lahaa.