WASIIRKA DHALINYARADA IYO CIYAARAHA OO BOOQDAY DHALINYARADDA 17 JIRADA EE XULKA QARANKA SOMAALIYEED.
Wasiirka wasaaradda dhalinyarada iyo ciyaaraha XFS Mudane Xil Maxamed Barre Maxamuud ayaa kormeer u kuurgelid ah ugu tegay xulka qaranka 17 jirrada oo u diyaar garoobaya koobka qaramada Afrika ee bisha April ka furmi doona Algeria.
Wasaaradda dhalinyarada iyo ciyaaraha XFS iyo xiriirka Soomaaliyeed ee kubadda cagta ayaa iska kaashanaya in xulkeenna xidigaha Badweyntu halaan tababarka ay u baahanyihiin si natiijo ay Shacabka Soomaaliyeed aqbali karaan usoo hooyaan.
Kormeerka uu wasiirku ku tegay garoonka ay tababarka ku qaadanayaan xulka qaranka ee 17 jirrada ah waxaa ku soo dhoweeyay guddoomiyaha KMG ee xiriirka Soomaaliyeed ee kubadda cagta Cali Cabdi Maxamed (Shiine) iyo masuuliyiin kale.
Macalinka xulka qaranka Nuur Amiin ayaa wasiirka warbixin ka siiyay diyaar garowga ay ku jiraan xulkeenna qaranku isagoo muujiyay kalsoonida uu ku qabo xidigaha Badweynta, wuxuuna u mahadceliyay wasiir Maxamed Barre Maxamuud oo uu tilmaamay inuu taageero hagar la’aan ah la garab taaganyahay xulka iyo maamulkoodaba.
Xulka qaranka ayaa lix maalmood oo todobaadka ka mid ah qaata tababarka si ay ugu diyaar garoobaan ciyaaraha sugaya ee qaramada Afrika.
Wasaaradda dhalinyarada iyo ciyaaraha ayaa xoogga saartay in la xoojiyo tartanka dugsiyada si ay usoo baxaan xul qaran oo anshax ahaan iyo xirfad ahaanba dhisan.
