WASIIRKA CADAALADDA DFS OO LA KULMAY WASIIRKA CADAALADDA DALKA TURKIGA

Wasiirka Wasaaradda Cadaaladda iyo Arrimaha Dastuurka XFS mudane Xasan Macalin Maxamuud iyo Wasiirka Caddaaladda ee dalka Turkiga mudae Bekir Bozdag ayaa kulan miro dhal ah ku yeeshay magaalada Ankara kaas oo ay uga wada hadleen xoojinta xiriirka labada waddan gaar ahan arrimaha la xiirira Cadaladda iyo sidii la iskaga kaashan lahaa la dagaalanka argagaxisada iyo dambiyada abaabulan.

Labada wasiir ayaa isla gartay in la sii xoojiyo xiriirka soo jireenka ah ee labada dal.

Sidoo kale, Labada wasiir ayaa is xasuusiyay in Soomaaliya ay tahay dalkii ugu horreeyay ee cambaareeyay isku daygii afgambigii dhicisoobay ee dalka turkiga ka dhacay.

Wasiirka Wasaaradda Caddaaladda iyo Arrimaha Dastuurka XFS mudane Xasan Macallin ayaa ka mahadceliyay garab istaagga ay dowladda turkiga la garab taagantahay walaalahooda Soomaaliya isagoo xusay in dowladda Turkiga ay Soomaaliya gargaartay xilli loo baahnaa isla markaana weli ay u taagantahay in ay sii xoojiso taageerada dhinac kasta ah.

Dhanka kale, Labada wasiir ayaa isla gartay in la soo nooleeyo heshiisyo horey u jiray oo aan la dhaqaajin muddooyinkii u dambeeyay, heshiiyadaas oo gaaraya afar heshiis oo ay ku jiraan kuwa la xiriira Cadaaladda iyo Garsoorka, Xeer ilaalinta, Dacwad oogista iyo Baaritaanka Dambiyada.

Ugu dambayn, Wasiirka Cadaaladda dalka Turkiga mudane, Bekir Bozdag oo fulinaya codsi uu u soo jeediyay wasiirka Wasaaradda Caddaaladda iyo Arrimaha Dastuurka XFS mudane Xasan Macalin Maxamuud ayaa ballan qaaday in uu Soomaaliya imaan doono islamarkaana Muqdisho lagu saxiixi doono heshiisyo dhowr ah oo la xiriira iskaashiga dhinacyada Caddaaladda iyo Garsoorka.