WASIIRKA CAAFIMAADKA SOMALILAND OO MAANTA SAFAR UGU AMBABAXAY GOBALKA HAWD

Wasirku-xigeenka Wasaaradda Horumarinta Caafimaadka Jamhuuriyadda Somaliland Mudane Liiban Yuusuf Cismaan (gaaxnuug) iyo wafti uu hogaaminayo Ayaa saaka Safar shaqo ugu ambaxay qaar ka mid ah deegaanada hoos imaada gobolka hawd.

Wasirku-xigeenka ayaa ugu horayn Dhagax dhigay xarunta Hooyadda iyo dhalaanka (MCH) ee deeganka Baargoo oo ay fulin doonto Wasaaradda Horumarinta Caafimaadka JSL, Wasirka ayaa waxaa safarka ku wehelinayay Isuduwaha Caafimaadka ee gobolka hawd iyo masuuliyiin kala duwan oo ka socotay Xukuumada,

Wasirku-xigeenka ayaa kula dardaarmay bulshada ku dhaqan dagmada baargoo inay ilaashadaan sidoo kalana ka faa,idaystaan Xaruntan cusub oo dhismaheedu si rasmi ah halkaa uga bilaabmi doono, Wasaaradda Horumarinta Caafimaadkuna ay mar walba u heelantahay sidii adeega Caafimaaddka loo gaadhsiin lahaa dhamaan gobolada iyo dagmooyinka dalka.

Intaa kadib Wasirku-xigeenka ayaa gaadhay magaalada baligubadle ee xarunta gobolka hawd, isagoo xadhiga ka jaray xarunta Hooyadda iyo dhalaanka ee SAMA WADE MCH oo ay iska kaashadeen Wasaaradda Horumarinta Caafimaadka iyo Bulshada kasoo jeeda deegaanka Baligubadle,

sidoo kale wasirka ayaa kormeeray xarunta isagoo uga mahadceliyay bulshada deegaanka iyo sida ay iskaga kaashadeen hirgelinta Xaruntani isagoo hoosta ka xariiqay ahmiyadda ay leedahay iskaashiga Bulshadu iyo sida ay muhiimka ugu tahay Horumarinta Qaranka iskaashiga bulshadu.