GUDDOOMIYE SHEEKH AADAN MADOOBE OO GUDDOOMIYEY SHIRKA GOLAHA WASIIRADA KOONFUR GALBEED.
Wasiirka arimaha dibada Somaliland ayaa kulan la qaatay Maayarada 23 Degmooyinka Doorasho ee dalka
Wasiirka Wasaarada Arrimaha Gudaha JSL Maxamed Kaahin Axmed, ayaa kulan la qaatay Maayarada 23 Degmooyinka Doorasho ee dalka Jamhuuriyadda Somaliland, kulankan ayaa loogu diyaar garoobayey Diiwaangelinta Codbixiyayaasha Somaliland, taasoo qabsoomaysa 28-12-2022.
Wasiirka Wasaaradda Arimaha Gudaha JSL Maxamed Kaahin Axmed ayaa faray Maayarada Dalka in u diyaar garoobaan Diiwaangelinta, taasoo ka dhacaysa deegaanada ay maamulaan Maayarada dalku, sidoo kale Wasiirku wuxuu warbixin ka siiyey Maayarada halka ay marayso diyaar garowga Diiwaangelinta Kaadh qaadashada Codbixiyayaasha Somaliland.
Wasiirka ayaa faray Maayarada in ay si hagar la’aan uga qayb galaan Diiwaan gelinta kaadh qaadashada, sidoo kale Wasiirka ayaa faray Maayarada in ay laba laabaan shaqada oo ay shaqada caadiga ah ay qabtaan habeenkii iyo gelinka danbe u bedelaan, maalinta inteeda kalena ay xooga saaraan ka shaqaynta Diiwaangelinta, taasoo ah mid muhiim ah Qarannimada Jamhuuriyadda Somaliland iyo himilooyinka Qarankani Leeyahay.
Maayarada dalka ayaa muujiyey sida ay diyaarka ugu yihiin ka shaqaynta Diiwaangelinta iyo in ay deegaanada ay Maayarada ka yihiina ay ku wacyigelinayaan shacabkooda ayna dedaal gelinayaan in bulshadu ay qaataan Kaadhka Diiwaangelinta, Wasiirka iyo Maayarada ayaa kala qaatay go’aan ah in xooga la saaro Diiwaangelinta mudada ay socoto.
Maayarada dalka ayaa door wayn ka qaadanaya Diiwaangelinta, taasoo ah waajib qofkasta oo Somalilander ah saaran in la hirgeliyo barmaamujka Diiwaangelinta, sidoo kale Maayarada ayaa mudada ay socoto Diiwaangelintuna dedaal ku bixin doona doorkooda sugida iyo adkaynta nabadgelyada.
Kulan Waxaa Wasiirka Arimaha Gudaha ku wehelinayey Wasiirka Wasaaradda Warfaafinta JSL, Dhaqanka iyo Wacyi-gelinta Sulayman Yusuf Koore, Wasiirka Wasaaradda Shaqo gelinta Arrimaha Bulshada Iyo Qoyska jsl Mustafe Godane, Wasiirka Wasaaradda Gaadiidka Iyo Horumarinta Jidadka Somaliland Cabdirisaaq Ibraahim faarax iyo Agaasimaha Guud ee Wasaaradda Arimaha Gudaha Mohamed Yusuf Ismail.
