WASIIR BEENEBEENE OO KA QEYB GALAY SHIRKA MAAMULKA MACHADKA IYO WASAARADDA QORSHEYNTA DALALKA CARABTA.

Wasiirka Wasaaradda Qorsheynta Maalgashiga iyo Horumarinta Dhaqaalaha XFS, Mudane Maxamuud Cabdiraxmaan (Beenebeene) ayaa maanta Dalka Kuwait kaga qeybgalay Shirka sannadlaha ee Golaha Sare Maamulka machadka iyo Wasiirrada Qorshaynta dalalka Carabta ee ku saabsan qorshaynta & horumarinta dhaqaalaha.

Wasiirka oo khudbad ka jeediyay shirka ayaa Wasiirrada Dalalka Carabta iyo Mas’uuliyiinta kale ee ka soo qeybgalay la wadaagay heerka dhaqan dhaqaale ee Soomaaliya xilligaan, waxaa kale uu khudbaddiisa ku xusay horumarka Dalka ka socda, Guulaha laga gaaray la dagaallanka aragagixisda, Arrimaha Abaaraha, Maalgashiga iyo fursadaha xilligaan taagan ee laga faa’iideysan karo.

“Fursado maalgashi ayaa ka jira dalkeenna, oo aan shirkii Maalgashi ee ugu dambeeyay ku soo bandhignay, kuna soo jeeddinnay indhaha caalamka, cid kasta oo ku taamaysa in maalgashi cusub sameysana gacmo furan ayaan ku soo dhoweyn doonnaa.” Ayuu yiri Xildhibaan Beenebeene, Wasiirka Qorsheynta Soomaaliya khudbaddan ka hor jeediyay Wasiirrada Qorsheynta dowladaha Carabta.

Madaxda sare ee Machadka Qorsheynta Carabta API, Wasiirrada Dalalka Carabta, Khuburro ka faallooda arrimaha dhaqaalaha iyo madaxda Safaaradda Soomaaliya ee dalka Kuwiet ayaa goobjoog ka ahaa shirkan oo ah sannadle, maantana ka furmay dalka Kuwait.