Waraabe cunay carruur & Ciroole oo laga baadi-goobayo Itoobiya.
Duleedka Magaalada Addis Ababa waxaa laga baadi-goobayaa Waraabe Dad cun noqday kaddib markii uu nafta dhaafiyay 8 qof oo Carruur & Da’ ah sida ay xaqiijiyeen mas’uuliyiin katirsan maamulka qaabilsan Duur-joogta.
Waraabahaan oo baxsad ah ayaa la daba-dhigay Dad u tababaran in ay ku keenaan raq ama ruux middii uu noqda howlgalkooda khatarta ka dhalan karta sida uu xaqiijiyay sarkaal katirsan xubnaha loo xilsaaray howlgalkaan.
Xogta weerarka uu geystay waraabaha ayaa soo baxday billaawgii December 2022 kaddib markii la arkay Dad dhintay oo qayb kamid ah jirkooda la waayay, baaris lagu sameeyay ayaa lagu xaqiijiyay in uu Waraabe cunay.
Hal deegaan oo keliya ayaa lagu ogaaday dhowr qof oo isku qaab u dhintay jirkooda u maqan, taasi waxa ay dhalisay baraarug xooggan iyo dabagal loo xilsaaray dadka ku takhasusay raad-raaca duur-joogta.
Deegaanka Leege Taafo oo 17 KM u jira Magaalada Addis Ababa ayuu Waraabahaan ku dilay wiil ku sugnaa goob dhismo ka socday, xogtiisa oo la dhayalsaday ayaa fududeysay in dhowr ruux oo kale uu Waraabahaas nafta dhaafiyo.
Dagaallada ka dhacay Waqooyiga Itoobiya ee sababay in dadka qaar maydkooda la qaadi waayay ayaa loo arkaa in ay sababtay in duur-joogta ay bartaan cunista Hilibka Dadka, Khubarada duur-joogta sida dhaw ula socda ayaa soo jeediyay in baaris dhammeystiran la sameeyo.
