Rikoodh 9 Sano Ka Hor Laga Dhigay Ayuu Sameeyay.

Xiddiga João Félix ayaa albaabka dambe ka galay taariikhda horyaalka premier League kadib markii uu ciyaaray kulankiisii ugu horeeyay ee Blues.

30 Saac kadib markii uu ku soo biiray kooxda João Félix ayaa ku bilowday shaxda chelsea kulankii ay Blues guuldarada kala kulantay kooxda Fulham kulan ka tirsanaa premier League.

João Félix ayaa doonayay in uu isku muujiyo taageerayaasha kooxdiisa isla markaas cadeeyo in uu si weyn u caawin karo kooxda.

Laakiin habeenkiisa ayaa ku dhamaaday si aad u xun kadib markii kaadhka cas ee tooska ah loo taagay daqiiqadii 58-aad oo ahayd bilowga qaybta dambe ee ciyaarta.

Xiddiga Joao Felix ayaa noqday xiddigii ugu horeeyay ee chelsea u ciyaara ee kaadhka cas loo taago kulankiisa ugu horeeya ee premier League.

Sidoo kale Felix ayaa noqday xiddigii ugu horeeyay ee kaadhka cas loo taago kulankiisa ugu horeeya premier League tan ilaa Federico Fazio oo sidaas sameeyay 2014 isaga oo u ciyaarayay Tottenham kulan ay la ciyaaraysay man City.