Netherland Mise Argentina? Rafael van der Vaart Oo Saadaaliyay Kulanka Adag Ee Caawa.

Ciyaaryahankii hore ee Netherland Rafael van der Vaart ayaa rajo ka qaba in Holland ay garaaci doonto Argentina una gudbi doonto semi-finalka Koobka Adduunka 2022.

Xulka Argentina ayaa isha ku haysa in ay ku guulaystaan tartamada waaweyn oo xidhiidh ah kadib markii ay ku guulaystay Copa America waxana ay doonayaan in ay soo afjaraan abaarta koobka adduunka.

Lionel Messi iyo saaxiibadiis ayaa wajihi doona Netherlands kulan aad u xiiso badan oo ka dhici doona garoonka Lusail Stadium maanta oo jimce ah iyada oo xulka badiya midkood ka hor tagi doono Brazil ama Croatia semi-finalka.

Van der Vaart ayaana aaminsan in xulka Netherlands uu u gudbi doono marxalada soo socota iyadoo xulka Argentina uuna halis galin doonin xulkiis marka laga reebo Lionel Messi.

“Waxa ay Netherlands ku badin doontaa guul fudud oo 3/0 ah, Messi mar kale waxa uu muujiyay in uu yahay midka ugu fiican adduunka laakiin xiddigaha xulkiisa ayaan ahayn kuwo fiican”ayuu van der Vaart u sheegay OP1.