IBRAHIM VIC OO SHEEGAY IN MESSI LA XASUUSAN DOONO QAAB CIYAAREEDKIISA IYO TAARIIKHDA UU KA SAMEEYAY KUBADDA CAGTA

Weeraryahanka kooxda AC Milan ee Zlatan Ibrahimovic ayaa ka hadlay xulkii Argentina ee bishii hore ku guuleystay Koobkii Aduunka ee Qatar ka dhacay.

 

La Albiceleste ayaa kusoo guuleystay Koobka aduunka oo ay rigoorayaal kaga qaadeen, goolhaye Emiliano Martinez iyo kabtan Lionel Messi ayaa ahaa xiddigaha ugu doorka weyn.

 

Xiddigaha xulka ayaa sida caadiga ah si weyn ugu damaashaaday guushoodaas balse dabaaldegyadooda qaar ayaa loo arkay kuwo ka badbadis ah sida goolhaye Martinez oo marar badan ku jeesjeesay weeraryahanka France ee Kylian Mbappe.

Ibrahimovic oo wargeyska Marca la hadlay ayaa sheegay in Messi loo arko midka ugu fiican abid oo markasta la xasuusan doono mustaqbalka balse xiddigaha kale ee Argentina ay si xun u dhaqmeen Koob dambena ku guuleysan doonin.

 

“Messi waxa loo tixgeliyaa midka ugu wanaagsan taariikhda waxaana lagu xasuusan doonaa inuu Koobka aduunka ku qaaday Qatar balse waxaan u werwersanahay ciyaartoyda kale ee xulka Argentina sababtoo ah waxkale kuma guuleysan doonaan” ayuu yidhi Ibra.

“Messi waxkasta wuu kusoo guuleystay waana la xasuusan doonaa balse inta kale si xun ayay u dhaqmeen”