GUDDIGA GAADIIDKA OO U YEERAY WASIIRKA DEGEDAHA IYO GADIIDKA BADDA
Guddiga Gaadiidka, Garoommada, Dekedaha, Hawlaha Guud iyo Tamarta ee Golaha Shacabka BJFS oo gudanaya waajibaadkiisa uu u xilsaaranyahay ayaa maanta Xafiiska Guddiga ugu yeeray Wasiirka Dekedaha iyo Gaadiidka Badda ; Mudane Abdillahi Ahmed Jaamac (Ilkajiir) oo ay weheliyaan Wasiirudawlaha iyo Agaasimaha Guud ee Wasaaraddaasi.
Kulanka oo uu shir guddoomiyay Guddoomiyaha Guddiga Xil. Abdillahi Abdi Mohamed (Geelqaad) ayaa masuuliyiinta wasaaradda looga dhageystay shaqada Wasaaradda ka socota oo ay ugu horreeyaan dib udhiska lagu ballaadhinayo dekedda Muqdisho, Wada shaqeynta Wasaaradda iyo Shirkadda Albeyrak ee maamusha Dekedda Muqdisho, sidoo kale qorshayaasha guud ee Wasaaraddu adeeggeeda ku fidinayso dhammaan Maamul Goboleedyada dalka.
Guddiga ayaa suaalo oraaheed waydiiyey masuuliyiinta Wasaaradda sidoo kalena u muujiyey inay diyaar u yihiin inay wasaaradda kala shaqeeyaan meel kasta oo ay caqabad kasoo waajahdo.
Arrimaha aadka loo dul istaagay waxa ka mid ah sidii loo dhiirrigelin lahaa dhisidda ama yagleelidda dekedo kuwaas oo muhiim u ah koboca dhaqaalaha, sidoo kale in la helo waddooyin ka baxa dekedaha dalka kuwaas oo isku xidha dekedaha iyo dalka intiisa kale amma waddamada jaarka. Iyo ugu dambayntii in heshiiska Shirkadda Albeyrak wasaaraddu hoos u eegto lana hubiyo in la fuliyey dhammaan qodobbadii lagu heshiiyey 2013 kii.
kulanka oo ku soo dhamaaday is fahan ayaa loo ballamay in kormeer lagu sameeyo Dekedda Muqdisho, Dekedda qallalan (Dry Port) ee ku taalla aagga garoonka, iyo sidoo kale dekedaha kale ee dalka.
