Maanta oo ah maalinta koowda ee sanadka 2022-ka, waxaa hirgalay isafgarad ay kala saxiixdeen wasaaradda warfaafinta, dhaqanka iyo dalxiiska xukuumadda federaalka iyo safaaradda Talyaaniga ee Soomaaliya.

Isafgaradka oo ku saabsanaa in Radio Muqdisho lagu soo celiyo baahiyo barnaamij maalinle ah oo ku baxaya luuqadda Talyaaniga ayaa wazxaa si rasmi ah u furey agaasimaha guud ee wasaaradda Mudane Cabdulaahi Xayir Ducaale, ka dib xaflad kooban oo lagu qabtay xarunta wasaaradda warfaafinta.

Munaasabadda waxaa ka soo qeyb galay qaar kamid ah agaasime waaxeedyada wasaaradda oo uu kamid yahay agaasimaha Radio Muqdisho mudane Maxamed Kaafi Sheekh Abuukar iyo mas’uuliyiin kale.

Cali Xuseen Yaasiin Koraado iyo Cabdulqaadir Cumar Maxamuud ayaa ah daadihiyaasha barnaamijkan oo bixi doona, 2:30 duhurnimo ilaa 3:00 Galabnimo ee xilliga geeska Afrika.

Radio Muqdisho oo la aas-aasay sanadkii 1951-kii sagaal sano ka hor xornimadii Soomaaliya, waxuu xiriir qota dheer la leeyahay dowladda Talyaaniga.

Wasaaradda warfaafinta, dhaqanka iyo dalxiiska JFS waxay hadda dib u cusbooneysiisay isafgaradkii Radio Muqdisho iyo dowladda Talyaaniga oo saaxiib dhow la ah shacbiga iyo dowladda Soomaaliyeed.